سٹی ٹریفک پولیس راولپنڈی کا 12 ربیع الاوّل کے جلوسوں کے لئے ٹریفک پلان جاری

سٹی ٹریفک پولیس راولپنڈی نے 12 ربیع الاوّل کے جلوسوں کے لئے ٹریفک پلان جاری

راولپنڈی

شمشاد مانگٹ

سٹی ٹریفک پولیس راولپنڈی نے 12 ربیع الاوّل کے جلوسوں کے لئے ٹریفک پلان جاری کردیا ہے جس کے تحت ٹریفک پولیس کے7 ڈی ایس پی، 83 سینئر ٹریفک وارڈنز سمیت کل 455 سے زائد افسران و اہلکاران ڈیوٹی انجام دیں گے۔

سٹی ٹریفک پولیس کے ترجمان کے مطابق 12 ربیع الاوّل کے موقع پر راولپنڈی میں دو مرکزی جلوس نکالے جائیں گے ، ایک جلوس جامعہ مسجد حنفیہ جامع مسجد روڈ جبکہ دوسرا 22 نمبر چونگی سے بر آمد ہو گا جامعہ مسجد حنفیہ والا جلوس شہر کے مختلف راستوں پل شاہ نذر، بنی چوک، مری روڈ، کمیٹی چوک، لیاقت روڈ، فوارہ چوک، ڈنگی کھوئی سے ہوتا ہوا مرکزی کیمپ جامع مسجد دائرہ کی شکل اختیار کرے گا ۔

جلوس کے گزرگاہوں والے مقامات سے مرحلہ وار ڈائیورشن لگا کر ٹریفک کو عارضی طور پر بند کیا جائے گا جلوس کے اوقات میں راولپنڈی سے اسلام آباد جانے والی ٹریفک کو جنگ بلڈنگ یو ٹرن سے کچہری چوک کی طرف موڑا جائے گا ۔

لیاقت باغ سے فوارہ چوک جانے والی ٹریفک کو ڈی اے وی کالج سے گوالمنڈی کی طر ف ڈائیورٹ کیا جائے گا اسی طرح دوسرا جلوس 22 نمبر چونگی سے نکالا جائے گا ، یہ جلوس ٹنچ روڈ ڈھوک سیداں چو ک، کلمہ چوک، 22 نمبر چوک، آدڑہ روڈ، سٹیٹ لائف بلڈنگ ٹرن، ایم ایچ چوک، محفوظ چوک، مانسہرہ اڈہ، تھانہ کینٹ، نشتر سٹریٹ، آدم جی روڈ، احاطہ مٹھو خان، ریلوے روڈ ملٹری اکاؤنٹ، کامران مارکیٹ سے جی ٹی ایس چوک (پرانا واران اڈہ) اختتام پذیر ہو گا ۔

جلوس کے دوران کلمہ چوک سے 22 نمبر چوک آنے والی ٹریفک کو ہارلے سٹریٹ کی طرف بھیجا جائے گا دوران جلوس خٹک چوک، سی ایم ایچ اور ٹنچ جانے والی ٹریفک کو ہارلے سٹریٹ کی طرف موڑا جائے گا ، جلوس مال روڈ پہنچنے پر پشاور روڈ سے آنیوالی ٹریفک کو قاسم مارکیٹ سے شیر خان روڈ ڈائیورٹ کیا جائے گا ، کچہری چوک سے پشاور روڈ جانے والی ٹریفک کو ٹی ایم چوک سے مری روڈ کی طرف موڑا جائے گا سی ٹی او راولپنڈی فرحان اسلم کے مطابق جلوس میں ٹریکٹر ٹرالی، شہزور، ٹرالر اور ٹرک وغیرہ کا داخلہ مکمل طور پر ممنوع ہو گا ۔

سٹیج سی 300 گز کے ایریا میں کسی قسم کی پارکنگ نہیں ہونے دی جائے گی ایمبولینس، فائر بریگیڈ و دیگر ایمرجنسی گاڑیوں کیلئے خصوصی پلان بھی مرتب کیا گیا ہے دوران جلوس شہر میں ہیوی ٹریفک کے داخلے پربھی مکمل پابندی ہو گی۔

سکیورٹی کے پیش نظر جن مرکزی شاہراہوں پر جلوس برآمد ہو ں گے وہاں سے ٹریفک کو متبادل راستوں پر ڈائیورٹ کیا جائے گا ٹریفک کو متبادل راستوں پررواں دواں رکھنے کیلئے اضافی اہلکار تعینات کئے گئے ہیں ۔

عید میلاد النبیﷺ کے موقع پر شہری کسی بھی پریشانی کی صورت میں ھماری ھیلپ لائن 051.9274843 پر رابطہ کر سکتے ہیں۔