لوئر دیر میں سکیورٹی فورسز کا آپریشن ، 10 خوارج ہلاک، 7 جوان شہید

لوئر دیر میں سکیورٹی فورسز کا آپریشن ، 10 خوارج ہلاک، 7 جوان شہید

دہشت گردوں کے خلاف آپریشن میں افغان شہریوں کی ملوث ہونے کی تصدیق ،آئی ایس پی آر

راولپنڈی

شمشاد مانگٹ

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے لوئر دیر کے علاقے لال قلعہ میں دہشت گردوں کے خلاف ایک کامیاب آپریشن کیا، جس کے دوران 10 خوارج جہنم واصل کر دیئے گئے۔ تاہم، اس کارروائی کے دوران 7 بہادر سپاہی وطن پر قربان ہو گئے۔

آئی ایس پی آر کے مطابق، یہ آپریشن خفیہ اطلاعات پر کیا گیا جس میں دہشت گرد فتنہ الخوارج کے ارکان کی موجودگی کی اطلاع ملی تھی۔ سکیورٹی فورسز اور دہشت گردوں کے درمیان شدید فائرنگ کا تبادلہ ہوا، جس میں 10 خوارج ہلاک ہو گئے۔ اسی دوران، 7 پاکستانی سپاہی بھی شہید ہو گئے جن میں نائیک عبدالجلیل، نائیک گل جان، لانس نائیک عظمت اللہ، سپاہی عبدالمالک، محمد امجد، محمد داؤد اور فضل قیوم شامل ہیں۔

شہید ہونے والے اہلکاروں نے خوارج کے ہاتھوں یرغمال شہریوں کو آزاد کرانے کی کوشش کرتے ہوئے اپنی جان کا نذرانہ پیش کیا۔ پاک فوج نے اپنے بیان میں کہا کہ ہمارے بہادر جوانوں کی قربانیاں ہمارے عزم کو مزید مضبوط کرتی ہیں اور دہشت گردی کے خاتمے کے لیے ہماری پختہ کمٹمنٹ کو ظاہر کرتی ہیں۔

آئی ایس پی آر کے مطابق خفیہ اطلاعات میں یہ بات سامنے آئی ہے کہ ان دہشت گردانہ کارروائیوں میں افغان شہری بھی ملوث تھے۔ پاکستان نے توقع ظاہر کی ہے کہ عبوری افغان حکومت اپنی سرزمین کو پاکستان کے خلاف دہشت گردی کی سرگرمیوں کے لیے استعمال نہیں ہونے دے گی۔ پاکستان کو امید ہے کہ افغان حکومت اپنی ذمہ داریاں نبھائے گی۔

پاک فوج نے کہا کہ ان آپریشنز کا مقصد بھارتی حمایت یافتہ دہشت گرد گروپوں کا خاتمہ کرنا ہے اور اس حوالے سے سینی ٹائزیشن آپریشن جاری ہے۔ سکیورٹی فورسز کا عزم ہے کہ وہ ملک سے بھارتی سرپرستی میں دہشت گردی کے ناسور کو جڑ سے اُکھاڑ پھینکیں گے۔