سیکیورٹی فورسز کی کارروائیاں، فتنۃ الخوارج اور فتنۃ الہندوستان سے تعلق رکھنے والے 13 دہشت گرد ہلاک، 4 گرفتار

بلوچستان میں سیکیورٹی فورسز کی کارروائیاں، فتنۃ الخوارج اور فتنۃ الہندوستان سے تعلق رکھنے والے 13 دہشت گرد ہلاک، 4 گرفتار

راولپنڈی

بلوچستان کے دارالحکومت کوئٹہ، ضلع کیچ اور خضدار میں سیکیورٹی فورسز نے خفیہ اطلاعات کی بنیاد پر تین الگ الگ کارروائیوں کے دوران بھارتی حمایت یافتہ دہشت گرد تنظیموں فتنۃ الخوارج اور فتنۃ الہندوستان کے نیٹ ورکس کو بڑی ضرب لگائی ہے۔

پاک فوج کے شعبہ تعلقات عامہ (آئی ایس پی آر) کے مطابق 30 ستمبر اور یکم اکتوبر کو کیے گئے ان آپریشنز میں مجموعی طور پر 13 دہشت گرد ہلاک اور 4 گرفتار کیے گئے۔ کوئٹہ میں خوارج کی موجودگی کی اطلاع پر انٹیلی جنس بیسڈ آپریشن کے دوران شدت پسندوں کے ٹھکانے کو مؤثر طور پر نشانہ بنایا گیا، جس کے نتیجے میں بھارت کے حمایت یافتہ 10 دہشت گرد مارے گئے، جبکہ بھاری مقدار میں اسلحہ، گولہ بارود اور بارودی مواد برآمد کیا گیا۔

ضلع کیچ میں کی گئی ایک اور کارروائی میں فتنۃ الہندوستان کے تین دہشت گردوں کو ہلاک کیا گیا، جو سیکیورٹی فورسز، تنصیبات اور عام شہریوں کو نشانہ بنانے کی منصوبہ بندی میں ملوث تھے۔

دریں اثنا ضلع خضدار میں خفیہ اطلاع پر کیے گئے ایک علیحدہ آپریشن کے دوران چار دہشت گردوں کو زندہ گرفتار کر لیا گیا، جو بزدلی کا مظاہرہ کرتے ہوئے خواتین کے لباس میں فرار ہونے کی کوشش کر رہے تھے، ان کے قبضے سے بھی اسلحہ اور بارودی مواد برآمد ہوا۔

آئی ایس پی آر کے مطابق تمام گرفتار اور ہلاک دہشت گرد مختلف تخریبی کارروائیوں میں ملوث تھے اور ملک کے اندر بھارتی پراکسی ایجنڈے کو آگے بڑھا رہے تھے۔ سیکیورٹی فورسز نے علاقے میں کلیئرنس آپریشن بھی شروع کر دیا ہے تاکہ باقی ماندہ دہشت گرد عناصر کا خاتمہ کیا جا سکے۔

پاک فوج کے ترجمان نے واضح کیا کہ پاکستان کی سیکیورٹی فورسز دہشت گردی کے مکمل خاتمے کے لیے پرعزم ہیں اور قوم بھی اس عزم کی مکمل حمایت کرتی ہے کہ دہشت گردوں اور ان کے سہولت کاروں کو ہر حال میں انصاف کے کٹہرے میں لایا جائے گا۔