ڈیرہ غازی خان میں اسمگلنگ کی بڑی کوشش ناکام، کسٹمز نے 1 کروڑ 34 لاکھ روپے مالیت کی چاندی ضبط کرلی

ڈیرہ غازی خان میں اسمگلنگ کی بڑی کوشش ناکام، کسٹمز نے 1 کروڑ 34 لاکھ روپے مالیت کی چاندی ضبط کرلی

اسلام آباد

شمشاد  مانگٹ

کلیکٹریٹ آف کسٹمز ملتان نے اسمگلنگ کی ایک بڑی کوشش ناکام بناتے ہوئے بھاری مقدار میں چاندی ضبط کرلی ہے۔ فیڈرل بورڈ آف ریونیو (ایف بی آر) کے مطابق ضبط کی گئی چاندی کی مالیت ایک کروڑ چونتیس لاکھ روپے بتائی گئی ہے۔

ترجمان ایف بی آر کے مطابق کارروائی ڈیرہ غازی خان کے قبائلی علاقے بواتہ کے قریب کی گئی، جہاں ایک مسافر بس کی تلاشی کے دوران 30 کلوگرام اسمگل شدہ چاندی برآمد ہوئی۔ کسٹمز حکام کے مطابق بس کے کسی مسافر نے چاندی کی ملکیت کا دعویٰ نہیں کیا۔

ضبط شدہ چاندی کو کسٹمز ایکٹ 1969 کے تحت تحویل میں لے لیا گیا ہے، جبکہ اسمگلنگ میں ملوث عناصر کے سراغ، سامان کے ماخذ اور استعمال ہونے والے روٹس کی نشاندہی کے لیے مزید تفتیش جاری ہے۔

ایف بی آر کے ترجمان نے کہا کہ ادارہ محصولات کے تحفظ اور ملک کے تمام داخلی و خارجی راستوں پر کسٹمز قوانین کے مؤثر نفاذ کو یقینی بنانے کے لیے پُرعزم ہے۔