روس کا تیل،ہمارے دور میں حرام اب حلال۔۔حماد اظہر

لاہور(سپیشل رپورٹر)حماد اظہر کا کہنا ہے کہ پی ڈی ایم ماضی میں کہتی تھی روس سے تیل خریدا تو پاکستان پر معاشی پابندیاں لگ جائیں گی۔ تفصیلات کے مطابق سابق وفاقی وزیر اور رہنما تحریک انصاف حماد اظہر نے ٹویٹر پر اپنے بیان میں کہا ہے کہ پی ٹی آئی نے روس سے سستے تیل کی پہلی کارگو پچھلے سال اپریل میں موصول کرنی تھی،اس سلسلے میں نے روسی حکام کی درخواست پر ان سے ہوئی تمام بات چیت کو تحریری شکل دے کر روسی ہم منصب کو پاکستانی سفیر کے ذریعے بھجوایا تھا۔انہوں نے کہا کہ افسوس کہ پی ڈی ایم حکومت نے اس معاملے پر 14 ماہ ٹال مٹول سے کام لیا،ماضی میں یہ کہتے رہے کہ یہ تیل ہماری ریفائنریز میں چل نہیں سکتا اور عالمی دنیا سے پاکستان پر معاشی پابندیاں لگ جائیں گی۔میں بار بار کہتا رہا کہ یہ جھوٹ ہے اور ایسا کچھ نہیں ہو گا۔ حماد اظہر کا کہنا تھا کہ اگر تحریک انصاف حکومت کے ساتھ ہوئی بات چیت پر عمل کیا جاتا تو اربوں ڈالر کا ملک کو فائدہ پہنچتا اور عوام پر مہنگائی کا بوجھ کم ہوتا۔یاد رہے کہ روس سے آنے والا تیل کی ترسیل آج سے شروع ہو گی،پیٹرولیم مصنوعات کی قیمتوں میں 30 سے 40 روپے تک کمی متوقع ہے۔ حکام وزارت پیٹرولیم نے کہا کہ روسی تیل سے پاکستانی میں پیٹرول سستا ہو جائے گا،آئندہ دو ہفتے میں روسی تیل مارکیٹ میں آ جائے گا۔ 45 ہزار ٹن کی پہلی کھیپ پی آر ایل میں ریفائن ہو گی،پارکو بھی روسی تیل کی ریفائنگ میں حصہ لے گا۔ ذرائع کے مطابق روسی تیل سے ریلیف کے اثرات یکم جولائی تک آنے کا امکان ہے،پیٹرولیم مصنوعات کی قیمتوں میں 30 سے 40 روپے تک کمی کا امکان ہے۔