شراب برآمدگی کیس ، علی امین گنڈا پور کے وارنٹ گرفتاری جاری

اسلام آباد کی ضلعی عدالت نے وزیر اعلیٰ کے پی علی امین گنڈا پور کے وارنٹ گرفتاری جاری کر دیے

اسلام آباد

شمشاد مانگٹ

اسلام آباد کی ضلعی عدالت نے اسلحہ اور شراب برآمدگی کیس میں وزیر اعلیٰ خیبر پختونخوا علی امین گنڈا پور کے وارنٹ گرفتاری جاری کر دیے۔ عدالت نے حکم دیا کہ انہیں گرفتار کر کے 17 ستمبر کو پیش کیا جائے۔

بدھ کے روز ڈسٹرکٹ اینڈ سیشن کورٹ میں جوڈیشل مجسٹریٹ مبشر حسن چشتی نے کیس کی سماعت کی۔ سماعت کے دوران ابتدائی طور پر گنڈا پور کی جانب سے کوئی نمائندہ موجود نہ تھا، بعدازاں ان کے وکیل راجا ظہور الحسن عدالت میں پیش ہوئے اور وارنٹ منسوخ کرنے کی استدعا کی۔

وکیل نے مؤقف اختیار کیا کہ اگر ملزم پیش ہو جائے تو وارنٹ منسوخ کیے جائیں۔ تاہم جج نے ریمارکس دیے کہ ’’آپ ملزم کو پیش کریں، میں وارنٹ منسوخ کر دوں گا۔‘‘ عدالت نے وکیل کی استدعا مسترد کرتے ہوئے وارنٹ برقرار رکھنے کا فیصلہ دیا۔

سماعت کے دوران وکیل نے مؤقف اپنایا کہ میڈیا پر خبر آنے کے باعث ان کے موکل کی سبکی ہو چکی ہے، تاہم عدالت نے کہا کہ اس معاملے پر وہ کچھ نہیں کہہ سکتے۔ عدالت نے مزید ریمارکس دیے کہ اگر کوئی جونیئر وکیل بھی تاریخ لے لیتا تو کیس ملتوی کر دیا جاتا۔

یہ مقدمہ تھانہ بارہ کہو میں درج کیا گیا تھا، جس میں وزیر اعلیٰ خیبر پختونخوا علی امین گنڈا پور کو نامزد کیا گیا ہے۔ آئندہ سماعت 17 ستمبر کو ہو گی۔